الثلاثاء، نوفمبر 28، 2006

بين الاحلام والحقيقة

17-11-2006
يوم خطوبتي
من وانا صغيرة ـ مش صغيرة قوي يعني يجي من الاعدادية كده ـ كنت بسرح وبحلم باليوم ده
واحلامي بالفعل اتحققت لكن ببعض التغيرات الطفيفة ويمكن التغيرات دي خلت الحقيقة اجمل من الاحلام
زي اي بنت اول احلامي كانت
ياترى هيكون شكل الفستان اية؟ اكيد هيكون فستان محصلش هيحتاج ل10 فتيات شرف لحمل ديلة !!
ده فستان خطوبة ديل اية بس ؟!!!
هو فستان الخطوبة من غير ديل طيب مشيها فستان منفوش قوي ولونه روز
في الحقيقة كان الون روز ولكن للمصادفه لم يكن فستان كان ويتش روز
وشعري حلمت بالشينيو والتاج المرصع والورود
ولم يبقي من الحلم غير الورود علي الحجاب الاسبنش
الفرح ياسلام علي الفرح في الحلم كان في الفور سيزون هو انا شوية في البلد و كل قرايبي ومعارفي وصحابي حتي البلوجية كانوا جنبي
في الحقيقة: الخطوبة تمت في دار المركبات وعدد المدعوين كان 50 فرد وكان منظري بايخ قوي وانا بعزم الناس سنجل من غير عائلاتهم ووانا بعتذر لاصدقائي وبقولهم تتعوض في الفرح وبقول للبلوجية خليكوا معايا وقفوا جنبي عن طريق البلوج
بس الحمد لله مفيش حد زعل وبجد ان شاء الله تتعوض في الفرح
الشبكة
في الحلم كانت سوليتير هو خاتم فقط بس يكون سوليتير يعني كام قيراط محترم ــ القناعة مهمة في الحاجات دي ! ـ
في الحقيقة : تم تأجيل شراء الشبكة 6 شهور علشان العريس يا ولداه حط اللي قدامه واللي وراه في الشقة
بس الدبلة لوحدها في ايدي شكلها تحفة واضحة وظاهرة كده.......ياناس انا قنوعه! او بكده بقنع نفسي
نيجي بقي للتقيل :العريس
في الحلم كان راكب حصان ابيض بجناحين
في الحقيقة هيونداي بستاج
في الحلم كان مذيع لامع ، معيد في الجامعة ، طبيب جراح ، مهندس ظابط
في الحقيقة : هو مهندس بس وظابط ورابط ومتحكم فيا انا
في الحلم كان طويل ووسيم
في الحقيقة : هو طووووووووووووووووووووووووووويل بزيادة .....اطول مني بيجي 30 سم
بس بصراحة ياجماعة بعيدا عن كل الاحلام العبيطة والمراهقة اللي كنت اوقات بحلم بيها من نفسي زي بقية البنات
الحقيقة دايما بتكون احلي لانها بتكون ابسط
وكفاية انها بتكون حقيقة
وعقبالكم جميعا تفرحوا وتتهنوا
ومن موقعي هذا ـ علي كرسي المكتب ـ بحب اشكر كل صحابي اللي اتصلوا وباركولي والبلوجية اللي بجد اخجلوا تواضعي بتهنتهم وكلامهم الرقيق وطبعا كل التهاني عزيزة علي قلبي لكن بالاخص تهنئةزورديك اللي اعتبرني اخته بالفعل ومحمد ابو الفتوح اللي اعتبرني قريبته وهيثم محفوظ اللي هيحيلي حفل خطوبة تاني في الساقية يوم 23 ديسمبر
واسمحولي اضيف بعض الصور من حفل الخطوبة علشان اخليكم تعيشوا معايا فرحتي






الخميس، نوفمبر 16، 2006

يادبلة الخطوبة عقبالكم كلكم


بكرة خطوبتي ياجدعان
عايزة كل البلوجية يبقوا جنبي ويدعولي
ملحوظة : تقبل برقيات التهنئة عن طريق البلوج
وعقبالكم جميعا

الأحد، أكتوبر 29، 2006

!عودة الندل



يااااااااااااااه رمضان عدى هوا والعيد كمان
كل سنة وانتم جميعا طيبين وسعداء
أكيد كل واحد منكم ليه شوية طقوس وطريقة للاحتفال بالعيد وخصوصا عيد الفطر يعني مثلا أنا متعوده علي السهر ليلة العيد حتي موعد صلاة العيد وبعدكده ابدأ في ارسال رسائل التهنئة لكل اصدقائي ومعارفي واستقبال ردودهم وبعد كده انام لي ساعتين واقوم علي غدوه مختلفة خالص عن كل وجبات رمضان الدسمة ..رنجة وملوحة وفسيخ وبعديها أحلي بشوية كعك وبتي فور وبعدها أقضي بقية العيد في البيت بقاسي من اعراض التلبك المعوي
المشكلة اني مبحرمش وكل سنة بقول توبة لكن بترميني المجادير ...علي رأي حليم
المهم بقي واللي خلاني اكتبلكم البوست ده ان من ضمن الرسايل اللي جاتلي السنة دي رسالة غريبة شوية
بتقول اية الرسالة:
ابليس يهنئكم بحلول العيد وانتهاء شهر رمضان وبيقولكم انه راجع راجع
وقعدت افكر هل فعلا ابليس هو السبب في ارتكابنا للذنوب ..يعني هو فعلا الناس في رمضان ما بتغلطتش علشان ابليس بيكون متسلسل ؟!
أَومال الناس اللي بتتخانق وبتكذب وبتظلم وتخون مين اللي بيسوس لها ؟!
وبعد تفكير عميق اكتشفت ان النفس كمان أماره بالسوء يعني ممكن تأمر صاحبها بما يضره
وان في بعض البشر تفوقوا علي ابليس ذات نفسه
أكيد كل واحد فينا فقد السيطرة مرة علي نفسه في رمضان وررد بينه وبين نفسه...اللهم اني صائم
وأكيد كمان ابليس رجع بعد أجازته السنوية وشاحن طاقته وشادد حيله ..ياتري نفسك امرتك بأية في رمضان
وشوشو عيّد عليك أزاي
ياريت تقولنا ونحاول كلنا نعمل وقفه في وجه نفسنا ونقول لشوشو هارد لك شوف غيرنا

السبت، أكتوبر 21، 2006

لا تسألني



سألتني انت : ما الذي غيرك؟!!ـ
ما الذي غيرك حبيبتي ؟ لم تكوني قاسية هكذا أبداً...ـ
قد كنتِ جنتي الرحبة التي أهرب إليها عندما تحاصرني متاعبي فكنت أشعر بقوتي وأنا أعيش ضعفي معك ِ وأشعر بضعفي وأنا قويا ً مع غيرك ، فلا أخجل من دموعي أمامك . ولا أخشى أن أبوح لكي بنقاط ضعفي ،لأنك تجربتي الوحيدة التي لا أخجل منها ولا أتنازل عنها ولا أتصور الحياة بدونها ، وأنت ِ حالة الصدق الوحيدة الباقية علي ظهر كوكب الارض ، ومازلت أراكِ ملاكِ الذي يحتويني وقت الخوف
فكيف الآن ترميني للضياع ؟!!!ـ

****************
لا أدري حبيبي بما أجيبك!ـ
ولكنك كنت لي دوماً زهرة في صحراء قلبي ، وعصفور في عشي، وعقد من اللؤلؤ علي صدري ، ولكن لا أدري متي أنطفأ بريق حبك ، ولمّا أنطفأ...ربما ياصديقي كنا نحيا وهما صدقناه ، ما أعرفه انني استيقظت ذات يوم فلم أجدك بقلبي!ـ
لا لم أخونك
لم أحب سواك
لم اكرهك
فقط... لم يعد لك مكان بقلبي لذلك دعني أرحل ..أبتعد عنك . ربما أندم وأعود لك..وربما تنساني أنت دعني أذهب بلا عتاب أو وداع ، فربما لا نلتقي ثانية ، أو ربما ألقاك وتلاقيني في صفحات رواية في كتاب أو حكايات أصحاب
دعني أكون لك ذكرى جميلة ..لا تمحوها الايام ..ولا تشوهها جراح الزمان ..دعني أمرّ في حياتك كالبرق لا كزلزال

الثلاثاء، أكتوبر 17، 2006

تامر العفيفي


قلبي عطوف لكن مبعرفش أعطف
وشي مخيف لكن مبعرفش أخوف
وكل يوم نفس السؤال بسأله
مهم أعرف وللا مش مهم اعرف؟
الكلام ده مش كلامي ده كلام الشاعر تامر العفيفي اللي نور مدونتي بالزيارة من يومين ، ولما زرت مدونته عجبني قوي أسلوب كتابته وقولت لازم أقولكم علشان تستمتعوا زي بما في مدونته
ربنا يوفقك ياشاعر

الأربعاء، أكتوبر 11، 2006

اشتغالات الشات والانترنت


بسبب بحر الكآبة اللي غرقت فيه المدونة بقالها مده وعلشان مفيش حد يستاهل وعلشان حكاية اتحكتلي عن واحد لسه عايش وهم الحب علي النت ومش عارف او مش عايز يصدق انها اشتغاله!هنزل البوست ده



الأحد، أكتوبر 08، 2006

عمر السعادة


مر عابر سبيل علي مقابر أحدي القرى وتعجب من قصر أعمار أهل القرية فقد كتب علي كل قبر عمر ساكنه
(من يرقد هنا عاش 10 شهور )
وهذا 5 شهور
وهذا شهر
وهذا اسبوع
وهذا يوم
وهذا ساعة
فذهب الي شيخ القرية ليسأله عن سبب قصر أعمار أهل القرية ربما السبب انتشار طاعون ما
فاجابه الشيخ: إن ما كتب علي هذه القبور ليس أعمار ساكنيها ولكن عمر أوقات السعادة التي عاشوها
فأهل القرية لا يحسبون أعمارهم بعدد الايام والسنين التي عاشوها ولكن بلحظات السعادة التي حظوا بها
ياتري لو حبيت أحسب عمري بطريقة أهل هذه القرية هكون اتولدت ولا لسه !!!ـ

الحسابة بتحسب! Free Web Counter
كيف تنشىء مدونة تدوين .. عالم المدونات كلام مش بفلوس!