الثلاثاء، يونيو 20، 2006

أنا بقيت خالتو


في الحقيقة أنا ماليش أخوات بنات يعني عمري ما هبقي خاله...ده اللي كنت متخيلاه في الأول
لكن اللي حصل أني بقيت خاله لأكتر من 10 أطفال والعدد في زياده الله يزيد ويبارك ويحفظهم يارب
وبسمع منهم أحلي لقب اخدته لحد دلوقتي(خالتو دعاء)
هما في الحقيقة أولاد بنات وأولاد خالاتي وعماتي وخالي وكده

بحبكم قوي ياأولاد أخواتي
خالتو دعاء

الخميس، يونيو 15، 2006

ليه بنخاف


سألتني:ها قابلتيه إمبارح؟
أنا: آة.
هي:امال مالك مش مبسوطة ليه؟
أنا: مش عارفة.
هي:هو ضايقك في حاجة؟
أنا :بالعكس.
هي:طيب اتكلمتوا في أية؟
أنا:اتكلمنا في حاجات كتير حكالي عن قصص حبه القديمة وسألني أنا كمان عن الحب في حياتي.
هي: طيب جميل قوي وبعدين.
أنا:ولا حاجه..وصلني ورجعت البيت.
هي:كل ده كويس أية بقي اللي مضايقك؟
أنا:مضايقني خوفي.
هي:واية اللي مخوفك؟
أنا:خايفة ابدأ قصة وتنتهي نهاية جارحة.
هي:وأية اللي خلاكي تظني أنها هتبقي نهاية جارحة؟
أنا:أظن كده.
هي:يابنتي تفاءلي ده ربنا بيقول (أنا عند ظن عبدي بي).
أنا:ونعم بالله.

الجمعة، يونيو 09، 2006

صور قديمة علي الحيطان


علي الحيطان صور لبنت صغيرة ..
صور أتصورتهم من زمان...
ماتعرف كام سنة فاتت عليهم ..
الصورة دية..
اتصورتها في استديو عم جمال
لبست الفستان وفكت الجدايل والقُصة علي الجبين
قالها المصور أضحكي !!
ضحكت وبينت السنان
لكن العيون فضحتها
العين الشمال :الدموع فيها رغرغت
والعين اليمين:اترسم فيها أمل لبكرة
الصورة أصبحت من اروع ما كان
كل اللي شافها قال دي موناليزا
الحزن والامل فيها مجتمعان
الصورة اتبروزت ببرواز يلمع
يمكن يداري الحزن اللي في العين الشمال
والصورة التانية:
اتصورتها في المدرسة مع زملاء الفصل زمان
في أول يوم للدراسة ؛كانت بتفرح قوي بالصورة ديه
لكن لما في يوم راحت لمدرسة زمان
لقت المدرسة اتهدت واتبني مكانها
مول كبير للمحلات والسينما كمان
حزنت وشالت الصورة من علي الجدران
والصورة ديه:
اتصورتها في فرح طنط وفاء
اللي اتجوزت حبيبها بعد سنين من الرفض والحرمان
لكن النهاردة شالت الصورة
لما عرفت إن طنط وفاء اتطلقت
لما عرفت إن حبيبها خان
والصورة ديه:
مع صحبتها حنان كانت حضناها في الصورة قوي
وكانت بتحبها وتتمني صداقتهم تدوم طول العمر
كده كانت كتبلها وراء الصورة
وكان مع الصورة بوكية ورد كمان
لكن مشاعر حنان دبلت قبل الورد بأيام
والصورة ديه:
لما أخذت جايزة المدرسة في العلوم
لما اخترعت جهاز عبقري
والميس بتقوللها عقبال جايزة نوبل كمان
وأدي البنت لا اخترعت تاني ولا حتي دخلت كلية العلوم
لكنها درست تاريخ ؛قالت أهي حاجة فيها أمجاد
لكن حتي التاريخ لقت فيه هزايم ونكسات
شالت البنت كل الصور ماعدا صورتها الموناليزية
لكن الغريب انها المرة دي لقت العيون الاتنين
مليانين دموع ومفيش في أي منهم لمسة ابتسام
غمضت العيون الاتنين
وشالت الصور كلها وعرت الحيطان
وقالت تنام يمكن تشوف في الاحلام اللي تتمناه
دعاء غريب

الاثنين، يونيو 05، 2006

الثعلب والديك

فاكرين قصيدة أمير الشعراء الثعلب والديك
اللي كانت مقررة علينا في 3 ابتدائي
القصيدة دي اثرت فيا جدا
اولا :جعلتني احب الشعر واتذوقه
وثانيا :سببت لي حالة رعب من الثعالب
مع اني عمري ما شفت ثعلب ولا حتي في حديقة الحيوان
بس شفت ناس كتير مكارة زي الثعالب واكتر


الثعلب والديك
لاحمد شوقي
برز الثعلــــب يومــــــــا في شعار الواعظينـــــــا
فمشي في الارض يهدي ويسب المـــــــــــــاكرينا
ويقول الحمــــــــــــد لله إلـــــه العالمينــــــــــــــا
ياعبـــــــــــــاد الله توبوا فهو كهف التأبينــــــــــا
واطلبــــــوا الديك يؤذن لصلاة الصبح فينــــــــــا
فــــــــآتي الديك رسولا من امام الناسكينــــــــــا
فأجــــــــاب الديك عذرا يا أضل المهتدينــــــــــــا
مخطـــــئ من ظن يوما أن للثعلب دينــــــــــــــــا

السبت، يونيو 03، 2006

شكر متأخر

دي أول يومية اتنشرت لي في مجلتي المفضلة

www.boswtol.com
والفضل يرجع لمحمد هشام عبيه
في اني اكتب اساسا بالاسلوب الساخر دة
وكمان يرجع له في اختيار العنوان الجامد لليومية
وكمان عرضها علي المجلة ونشرها


ميرسي يامحمد ولو انها متأخرة شويتين




عشر نصائح جامدين للمدرسين المساكين!


لو كنت اشتغلت قبل كدة مدرس أو بتفكر تشتغل فلا بأس مطلقا... إليكم خلاصة تجربتي.. كمدرسة.. مسكينة.. أقصد.. جامدة قوي...

أولا: لازم تكون صاحب عينين واسعتين ويستحسن ماتكونش ملونة ولازم تتعود تبرق دايما ولما تتنرفز عينك تطق شرار "لزوم إرهاب التلاميذ عصافير الجنة!".

ثانيا: يجب أن تكون بصحة جيدة وخاليا من الأمراض البسيطة والمستعصية. وخصوصا الأمراض النفسية ولابد أن تكون متفائلا زيادة عن اللزوم "عشان القهر اللي هتشوفه يعني!"

ثالثا: تكون عندك مناعة قوية ضد الأمراض بداية من أمراض الشتا والبرد لأن الفصل عندك مش هيبطل كحكحة "كح كح" وعطس "أتشووو".. انتهاء بأمراض الغدة والجدري والحصبة. وكل أمراض العيال الحلوين!

رابعا: أمن على حياتك بمبلغ محترم. وماتقلقش على الأقساط مش هتلحق تدفع قسطين على بعض... ومبروك مقدما للورثة!

خامسا: اوعى تدخل الفصل وموبايلك مفتوح علشان لو جالك مكالمة مش هتسمع كلمة من الدوشة والهيصة والزمبليطة اللي هيعملوها الأولاد علشان يبينوا للي سيادتك بتكلمه قد إيه إنت شخصيتك قوية ومسيطر عليهم!.. ويا عيني بقى لو كان اللي على التليفون الجو ولا المدام ولا أخوك الصغير يبقى ضمنت إنك في البيت كمان هتعيش مغلوب على أمرك!ويا ويلك يا سواد ليلك لو جالك "ميسد" بس مش هتخلص من التريقة عليك وعلى اللي رن لك وعلى بخل الناس في الأيام دي.الحاجة الوحيدة اللي ممكن تستفيد فيها من الموبايل إنك تلعب games في أوقات فراغك!

سادسا: إنت محتاج عصاية من النوع اللي بيعمل صوت مرعب في الهواء تهوش بيها بس. وخليك فاكر إن الضرب ممنوع بقرار من الوزارة.. بدل ما يقوم عيل مفعوص يفكرك بيها وعلى شفتيه ابتسامة تحمل خبث الدنيا كلها.

سابعا: لو عندك استشارة عن عطل عندك في الكمبيوتر أو الموبايل أو البلاي استيشن ماتروحش بعيد لأن عندك دكاترة متخصصين ورؤساء قسم في الفصل بتاعك ومستعدين لخدمة سعادتك والتوصيل للمنازل كمان.. وكله بالمجان!

ثامنا: اوعى.. وبكرر اوعى تسأل السؤال ده.. "نفسك تبقى إيه يا حبيبي لما تكبر؟".على غرار ما كان يفعله معنا مدرسونا زمان.. لأن الإجابة ستفجعك وهتنسد نفسك عن الحياة كلها!فلن تخرج الإجابة عن: هو حد لاقي شغل الأيام دي لما احنا هنلاقي.. أو عايز أشتغل "نانسي عجرم".. قصدي أغني زي "نانسي عجرم"!!!! مش قلت لك بلاش تسأل..

تاسعا: لو بتفكر تدي درس خصوصي.. فلازم تعرف إن نظام الدروس في ابتدائي نظام عجيب جدا لو عرفته الأمم المتحدة لضربتنا بصاروخين أرض جو!.. لأن لو سعادتك فكرت تدي درس ولو إن تخصصك لغة عربية مثلا فهتلاقي ولي الأمر يقول لك: "أنا عايزك تدي له كل المواد على بعض يا بلاش! "شروة يعني على بعضها".فستجد نفسك مطالبا بشرح العربي والحساب والعلوم والدراسات والإنجليزي... يعني لو إنت كنت متعقد من مادة معينة من صغرك؛ وحمدت ربنا وشكرته إنك خلصت منها ودخلت كلية بعيدة كل البعد عنها، فلا وألف لا! المادة دي مش هتسيبك في حالك وبدل ما كنت زمان مغصوب إنك تذاكرها وتفهم اللي تفهمه على قد ما تقدر وتطنش اللي ماتفهموش وتحشر مخك بالمعلومات وتخش اللجنة تفضي دماغك في الورقة وتخرج من اللجنة دماعك أبيض يا ورد، فدلوقتي الكلام ده ماينفعش.. إنت لازم تذاكر وتفهم كل حاجة وتحاول تبحث وتنقب عن كل خفايا المادة دي وإلا لو سألك تلميذك النجيب عن أي سؤال وماعرفتش هتبقى في نظره زي الـ.... الـ..... ولا بلاش! فخليك شطور وراجع اللي فاتك واللي ماتعلمتوش زمان جه الوقت اللي هتتعلمه فيه رضيت أم أبيت!!!!! وماتقولش التعليم كان زمان.. النهارده ممكن تتعلم قبل ما يفوت الأوان.. فصول محو الأمية في كل مكان!

عاشرا: خليك الشاب الروش واعرف الدنيا ماشية ازاي واتعلم الروشنة من طلبة الفصل بتوعك.. مش عيب إنك تتعلم منهم زي ما بتعلمهم، بدل ما تبقى واقف في الفصل مش فاهم حاجة من اللي بيقولوها..ولو مكسوف ونفسك مش مطاوعاك تسأل المفاعيص دول.. عندك "اللمبي" و"عوكل" و"بوحة" اشتري الأفلام واسهر عليها واحفظها عن ظهر قلب وبعدين اقف قدام المرايا واتدرب على تحية الصباح الجديدة واترحم على تحية صباح زمان أيام ما كان المدرس من دول يدخل الفصل ويقول: "صباح الخير".. فيرد عليه الفصل في نفس واحد ولا أحسن أوركسترا: "صباح النور على البنور يجعل صباحنا هنا وسرور"...فده كان زمان وراح لحاله.. من هنا ورايح ادخل الفصل واملأ صدرك بنسيم الصباح وبصوت ملعلع كده قول: "صبح صبح يا عم الحج"!!

دعاء غريب






الخميس، يونيو 01، 2006

أحبيني


أحبيني ...فإن كل من أحببتهم قبلك ماأحبوني

بدرشاكر السياب

الحسابة بتحسب! Free Web Counter
كيف تنشىء مدونة تدوين .. عالم المدونات كلام مش بفلوس!