السبت، يونيو 03، 2006

شكر متأخر

دي أول يومية اتنشرت لي في مجلتي المفضلة

www.boswtol.com
والفضل يرجع لمحمد هشام عبيه
في اني اكتب اساسا بالاسلوب الساخر دة
وكمان يرجع له في اختيار العنوان الجامد لليومية
وكمان عرضها علي المجلة ونشرها


ميرسي يامحمد ولو انها متأخرة شويتين




عشر نصائح جامدين للمدرسين المساكين!


لو كنت اشتغلت قبل كدة مدرس أو بتفكر تشتغل فلا بأس مطلقا... إليكم خلاصة تجربتي.. كمدرسة.. مسكينة.. أقصد.. جامدة قوي...

أولا: لازم تكون صاحب عينين واسعتين ويستحسن ماتكونش ملونة ولازم تتعود تبرق دايما ولما تتنرفز عينك تطق شرار "لزوم إرهاب التلاميذ عصافير الجنة!".

ثانيا: يجب أن تكون بصحة جيدة وخاليا من الأمراض البسيطة والمستعصية. وخصوصا الأمراض النفسية ولابد أن تكون متفائلا زيادة عن اللزوم "عشان القهر اللي هتشوفه يعني!"

ثالثا: تكون عندك مناعة قوية ضد الأمراض بداية من أمراض الشتا والبرد لأن الفصل عندك مش هيبطل كحكحة "كح كح" وعطس "أتشووو".. انتهاء بأمراض الغدة والجدري والحصبة. وكل أمراض العيال الحلوين!

رابعا: أمن على حياتك بمبلغ محترم. وماتقلقش على الأقساط مش هتلحق تدفع قسطين على بعض... ومبروك مقدما للورثة!

خامسا: اوعى تدخل الفصل وموبايلك مفتوح علشان لو جالك مكالمة مش هتسمع كلمة من الدوشة والهيصة والزمبليطة اللي هيعملوها الأولاد علشان يبينوا للي سيادتك بتكلمه قد إيه إنت شخصيتك قوية ومسيطر عليهم!.. ويا عيني بقى لو كان اللي على التليفون الجو ولا المدام ولا أخوك الصغير يبقى ضمنت إنك في البيت كمان هتعيش مغلوب على أمرك!ويا ويلك يا سواد ليلك لو جالك "ميسد" بس مش هتخلص من التريقة عليك وعلى اللي رن لك وعلى بخل الناس في الأيام دي.الحاجة الوحيدة اللي ممكن تستفيد فيها من الموبايل إنك تلعب games في أوقات فراغك!

سادسا: إنت محتاج عصاية من النوع اللي بيعمل صوت مرعب في الهواء تهوش بيها بس. وخليك فاكر إن الضرب ممنوع بقرار من الوزارة.. بدل ما يقوم عيل مفعوص يفكرك بيها وعلى شفتيه ابتسامة تحمل خبث الدنيا كلها.

سابعا: لو عندك استشارة عن عطل عندك في الكمبيوتر أو الموبايل أو البلاي استيشن ماتروحش بعيد لأن عندك دكاترة متخصصين ورؤساء قسم في الفصل بتاعك ومستعدين لخدمة سعادتك والتوصيل للمنازل كمان.. وكله بالمجان!

ثامنا: اوعى.. وبكرر اوعى تسأل السؤال ده.. "نفسك تبقى إيه يا حبيبي لما تكبر؟".على غرار ما كان يفعله معنا مدرسونا زمان.. لأن الإجابة ستفجعك وهتنسد نفسك عن الحياة كلها!فلن تخرج الإجابة عن: هو حد لاقي شغل الأيام دي لما احنا هنلاقي.. أو عايز أشتغل "نانسي عجرم".. قصدي أغني زي "نانسي عجرم"!!!! مش قلت لك بلاش تسأل..

تاسعا: لو بتفكر تدي درس خصوصي.. فلازم تعرف إن نظام الدروس في ابتدائي نظام عجيب جدا لو عرفته الأمم المتحدة لضربتنا بصاروخين أرض جو!.. لأن لو سعادتك فكرت تدي درس ولو إن تخصصك لغة عربية مثلا فهتلاقي ولي الأمر يقول لك: "أنا عايزك تدي له كل المواد على بعض يا بلاش! "شروة يعني على بعضها".فستجد نفسك مطالبا بشرح العربي والحساب والعلوم والدراسات والإنجليزي... يعني لو إنت كنت متعقد من مادة معينة من صغرك؛ وحمدت ربنا وشكرته إنك خلصت منها ودخلت كلية بعيدة كل البعد عنها، فلا وألف لا! المادة دي مش هتسيبك في حالك وبدل ما كنت زمان مغصوب إنك تذاكرها وتفهم اللي تفهمه على قد ما تقدر وتطنش اللي ماتفهموش وتحشر مخك بالمعلومات وتخش اللجنة تفضي دماغك في الورقة وتخرج من اللجنة دماعك أبيض يا ورد، فدلوقتي الكلام ده ماينفعش.. إنت لازم تذاكر وتفهم كل حاجة وتحاول تبحث وتنقب عن كل خفايا المادة دي وإلا لو سألك تلميذك النجيب عن أي سؤال وماعرفتش هتبقى في نظره زي الـ.... الـ..... ولا بلاش! فخليك شطور وراجع اللي فاتك واللي ماتعلمتوش زمان جه الوقت اللي هتتعلمه فيه رضيت أم أبيت!!!!! وماتقولش التعليم كان زمان.. النهارده ممكن تتعلم قبل ما يفوت الأوان.. فصول محو الأمية في كل مكان!

عاشرا: خليك الشاب الروش واعرف الدنيا ماشية ازاي واتعلم الروشنة من طلبة الفصل بتوعك.. مش عيب إنك تتعلم منهم زي ما بتعلمهم، بدل ما تبقى واقف في الفصل مش فاهم حاجة من اللي بيقولوها..ولو مكسوف ونفسك مش مطاوعاك تسأل المفاعيص دول.. عندك "اللمبي" و"عوكل" و"بوحة" اشتري الأفلام واسهر عليها واحفظها عن ظهر قلب وبعدين اقف قدام المرايا واتدرب على تحية الصباح الجديدة واترحم على تحية صباح زمان أيام ما كان المدرس من دول يدخل الفصل ويقول: "صباح الخير".. فيرد عليه الفصل في نفس واحد ولا أحسن أوركسترا: "صباح النور على البنور يجعل صباحنا هنا وسرور"...فده كان زمان وراح لحاله.. من هنا ورايح ادخل الفصل واملأ صدرك بنسيم الصباح وبصوت ملعلع كده قول: "صبح صبح يا عم الحج"!!

دعاء غريب






3 Comments:

At السبت, يونيو 03, 2006 11:41:00 م, Anonymous غير معرف said...

حلوة قوي
رحمة

 
At الاثنين, يونيو 05, 2006 2:46:00 م, Anonymous لينا said...

تحفة صدقيني
شوفي ازاي احنا قرايب وطول عمري عارفة ان دمك خفيف
بس انت فاجأتيني بالمقالة دي
انت موهوبة فعلا

 
At الأربعاء, يونيو 07, 2006 1:40:00 م, Blogger دعاء غريب said...

رحمة:تسلميلي يا روح قلبي وابقي خلينا نشوفك
لينا:احنا قرايب يجي كده من 278 سنة هههههههههه شفتي دمي يلطش أزاي
يابنتي ما فيش قاعده ثابته
ويارب اكون موهوبة فعلا زي ما انت بتقولي بس الحكم ده لسه بدري عليه قوي
وعموما ميرسي

 

إرسال تعليق

Links to this post:

إنشاء رابط

<< Home

الحسابة بتحسب! Free Web Counter
كيف تنشىء مدونة تدوين .. عالم المدونات كلام مش بفلوس!