السبت، يوليو 01، 2006

كلاكيت شكر لمحمد هشام لتاني مرة



في العدد الخامس والستين من جريدة الدستور الذي صدر بتاريخ الأربعاء 14 يونيو 2006
نشر لي مقالة ساخرة في صفحة التعليم واللي بيتعلموه تحت عنوان نصائح دستورية لبتوع الثانوية
ولكم أن تتصوروا مدي سعادتي بهذه المقالة وباسمي الذي كتب تحتها
والفضل في ظهور هذه المقاله في الدستور يرجع إلي أستاذي ومشجعي الأول ورافع معنوياتي محمد هشام عبيه
عارفة أنك بتضايق يامحمد من لقب أستاذي وكده
بس صدقني دورت في معجمي عن لقب يليق بيك لقيت إن لقب أستاذي شوية عليك
فياريت انت تختارلي لقب مناسب أناديك بيه
بس بجد يامحمد أنت ماتعرفش أنا سعيدة بالمقالة دي قد أية
فاكر لما سألتني أحساسك أية وانت ليك مقالة في الدستور عليها أسمك؟
قولتلك مبسوطة
قولتلي :مبسوطة بس!
قولتلك نفسي أفتح الجريدة علي مقالتي وأقول لكل الناس في الشارع أنا دعاء غريب صاحبة المقالة دي
ضحكت وقتها وقولتلي : لأ كفاية عليك الانبساط خلينا عاقلين أحسن
وضحكنا أحنا الأتنين وقولتلك : علي فكرة الدستور هتحقق مبيعات محصلتش الاسبوع ده !!!
وتقريبا كده معظم العدد ده أشتروه قرايبي وصحابي وأنا نفسي اشتريت 3 نسخ غير اللي أهدتهالي
وكان نفسي دلوقتي أكتر من أي وقت أن يكون عندي سكانر علشان أنزلها علي المدونة ..بس للاسف معنديش
فمضطرة أكتبها وخلاص علشان اللي ماقرأها في الدستور ويارب تعجبكم ومستنية رأيكم.

نصائح دستورية لبتوع الثانوية


علي أبواب الامتحانات ودماغك أفضي من جيب موظف في أخر الشهر ؛وحاسس انك داخل معركة موقفك فيها أصعب من موقف صدام ذات نفسه أمام محكمة العدل الدولية!!!!
ولا يهمك يابني معايا ليك شوية نصائح من اللي هيه هتقضي علي المهلبية اللي استوطنت في دماغك.
اولا:خليك واثق دايما في الحكمة اللي بتقول العقل السليم في الجسم السليم .وابدأ بصحتك امتنع فورا عن الفول بجميع مشتقاته من طعمية وبصارة ؛وانذرهم في البيت انهم لو مامنعوش الفول فانت عن نتيجة الامتحانات مش مسئول
.واختار انت ال(menu)المناسب لجو الامتحانات واعتمد فيها علي وجبة السمك او الجمبري او الكافياروده طبعا لزوم تلميع الذاكرة وتقوية النظر..فسفور يابني ده انت هتنور وتلعلع في اللجنة وأسأل مجرب ؛بس لو بعد ما أهلك يدفعوا دم قلبهم ويجبولك الجمبري والكافيار لو عكيت في الامتحان فانا مش مسئوله علي اللي هيجرالك واسأل مجرب برضه .
ثانيا:بعد بداية معسكر الامتحانات أمنع خالص التعامل مع المية والصابون ولا تقولي استحمى ولا اتشطف ولا اطش وشي بشوية مية...انت عايز المعلومات تطلع من مخك مع الغسيل .
لكن مفيش مانع قبل ما تبدأمعسكر المذاكرة تستحمي حمومه زي بتاعت العيد ولا أقولك عليك وعلي حمام التلات هيجلوك ويشيلوا الصدأ اللي في دماغك.
ثالثا:انزل السوق واشتري شوية الطلبات دي(نظارة وايشارب وموس حلاقة)الطلبات شاملة ولا د وبنات عارفه عارفه وهتقولي والشباب هيعملوا اية بايشارب :ده لزوم عصبة الدماغ يابني مفيش حاجة مضمونة دلوقتي علي رأي عمنا يوسف شاهين :حتي الافكار ليها اجنحة وبتطير.
والموس بقي فده علشان تجيبوا شعركم علي الزيرو ولاد وبنات مااحنا مش فاضين بقي لتسريح وسبسبه واحط جيل ولا زيت .
النظارة بقي فدي مش ممكن نستغني عنها اثناء المذاكرة واثناء الامتحان حتي لو نظرك 6/6حاد ضروري ضروري ماتنساش وابقي جرب كده وانت في مكانكفي اللجنة هتجيب ورقة الواد عبده الصميم اللي قاعد في أول اللجنة.
رابعا:تبنى دعوة (عودة الي الطبيعة )؛سيبك من بيتكم واخواتك اللي دوشينك والتليفون والموبيلات اللي مابتبطلوش رن واطلع علي سطوح بيتكم وفي وسط عشة الفراخ وعسكر ..مصلحه يمكن تتعدي منهم وتدخل لجنة خاصة ويرؤفوا بحالتك..بس بقولك اية مش عايزين بصبصه علي بنات الجيران وسيبك من البت نور العمشة مش هتنفعك في الامتحانات ولا هتبص في وشك لو سقطت شوف مصلحتك يابني.
خامسا:اعمل اشتراك مع المعلم دنقل صاحب القهوة اللي تحتكم اتفق معاه علي مشاريبك طول معسكر المذاكرة من نسكافية وكابتشينو وقهوة بالفستق(حلوة قوي بالمناسبة ابقوا جربوها)وقوله الحساب لما النتيجة تطلع وانجح نبقي نتحاسب علشان ابقي بالمرة احاسبك علي الشربات اللي هوزعه علي الحارة .
هيرد عليك المعلم:طيب لو مانجحتش مين اللي هيدفع الحساب؟
وقتها اقلب خلقتك وتطق شرار من عينك واشخط فيه وقوله:انت قولت اية مين ده اللي يسقط دي الملافظ سعد يا معلم قال اسقط قال طيب اشهدوا ياخلق لو سقطت يبقي الراجل ده اللي فسرها في وشي.
والتفت عائدا الي بيتك قائلا متأخرش المشاريب كاتكم القرف ماليتوا البلد.
بعد ما تنفذ شوية النصايح دي بحرص وبعد ما تاخد رضا والدتك وتخليها تدعيلك دعوتين حلوين ..توكل علي الله وادخل الامتحان لقاتل لمقتول وسيبك من الغش والبرشام والنبي يابني لو معاك الكتاب ومفتوح قدامك مش هتعرف تطلع الاجابة الحاجة الوحيدة اللي ممكن تنجحك في الامتحان الدعوتين اللي هتدعهملك الوالدة لو دعت بذمه
وبعد ما تخلص الامتحانات عليك وعلي بلاد الواك واك وماتخليش حد يعرفلك اثر لحد ما تطلع النتيجة وتطمئن
لان لو لا قدر الله وسقطت مش هتخلص من اهلك اللي هيطلعوا علي جتتك الجمبري والكافيار اللي اكلته.
ولا المعلم دنقل اكيد هيسلط عيال الحارة يجروا وراك ويحدفوك بالطوب ويقولولك كاتكم القرف ماليتو البلد!
وكله كوم واللي هتعمله البت نور العمشة كوم هتقولك بقي انت ياساقط يافاشل ماكنتش معبرني هو انت كنت تطول ده انا تيبلوم (دبلوم) تجارة ....يا فاشل.
فعليك يابني وعلي صحبك الانتيم اتفق معاه علي سيم من نوعية محمد بيسلم عليك لو كنت جايب ملحق واحد ومحمدين بيسلم عليك لو جبت ملحين وامة محمد بتسلم عليك لو سقطت خالص
بعد الشر عليك طبعا ولو نجحت ابقي ادعيلي

دعاء غريب

8 Comments:

At الأحد, يوليو 02, 2006 7:29:00 ص, Blogger المزاجنجي said...

ربنا يبارك لك يا دعاء افندي بجد انت متوصية على اولياء الامور طيب اقولك على كارثة وتصدقيها والله العظيم انا اعرف ناس قرايبي ابنهم في تانية اعدادي وعاملين له جمعية فلوس علشان يقبضوا 10000 عشرتلاف جنية لزوم الهم والعغم اللي اسمه الثانوية العامة والواد يا ولداه لسه في تانية اعدادي وانت تقولي لي جمبري وكفيار ارحمي خللي ربنا يرحمك

 
At الثلاثاء, يوليو 04, 2006 10:17:00 م, Blogger metkazy said...

مبروك يا دعاء على نشر مقالتك فى الدستور0
وبما انى بقرأ الجرنان ده من اول عدد ومن عشاقه فانا فرحانلك جدا وعقبال ما تغرقيلنا الجرنان كله تحقيقات ومقالات

للاسف هى الامتحانات اللى منعانى من متابعة كل المواضيع اللى فى الجرنان لكن بعد كده هدور على اسمك فى المقالات

هه شدى حيلك

 
At الأربعاء, يوليو 05, 2006 1:34:00 ص, Blogger دعاء غريب said...

من زمان :
الله يباركلك انت يافندم
بس أنا لا متوصية بأولياء الامور ولا حاجة
هما اللي عاملين من الحبة قبه زي قرايبك اللي عاملين جمعية لأبنهم علشان لما يدخل الثانوية
طيب وبعد مايجيب مجموع ويدخل كلية قمة
هيشتغل أية؟!!؟
ولا حاجة
طيب علي الاقل يأكلوه أكله حلوة جمبري ولا كافيار قبل ما يتصدم بالحقيقة المرة ويكتشف أنه عمره في حياته ماهيدوقهم تاني
"
"
بلد مش بتاعت شهادات بصحيح!!

metkazy:
الله يبارك فيك يافندم،ويسمع من بقك ربنا ويتنشرلي مقالة تانية حتي
"

إن شاء الله تكون أتوفقت في الامتحانات

 
At الخميس, يوليو 06, 2006 2:28:00 ص, Blogger محمد أبو زيد said...

أنا قريت المقال في الجرنان وكان عاجبني
وعموما ألف مبروك
وعقبال ما تبقي كده رئيس تحرير

 
At الخميس, يوليو 06, 2006 1:04:00 م, Blogger دعاء غريب said...

أ- محمد أبو زيد:
يافندم دي شهادة أعتز بيها والحمد لله إن المقالة عجبتك
والله يبارك فيك ...بس رئيس تحرير مرة واحدة عموما يسمع منك ربنا
نورتني يافندم بزيارتك

 
At الجمعة, يوليو 07, 2006 2:26:00 م, Anonymous رحمة said...

ألف مبروك يادودو
أنا شفت المقالة في الدستور وعجبتني قوي
بس هو مين محمد هشام عبية ده

 
At الجمعة, يوليو 07, 2006 8:17:00 م, Anonymous آية said...

مبروك
ربنا يوفقك
إنت أجدع بنت في صحابي كلها
وتستاهلي كل خير
أما عن النصايح
فدي نصايح تودي في داهية
ماعدا بس نصيحة الجمبري دي
طعمة قوي
:0)

 
At الأحد, يوليو 09, 2006 12:47:00 م, Blogger دعاء غريب said...

رحمة وأية
ميرسي علي زوقكم

 

إرسال تعليق

Links to this post:

إنشاء رابط

<< Home

الحسابة بتحسب! Free Web Counter
كيف تنشىء مدونة تدوين .. عالم المدونات كلام مش بفلوس!