الأحد، سبتمبر 17، 2006

يارب احفظها.. بسمة صغارنا

علي مدارسكم
المولى حارسكم

بنات وبنين

انتوا ولادنا

وشمس بلادنا
ونور العين
****************

شدوت..(بلاش شدوت دي) غنيت هذه الاغنية اليوم وأنا أقف في البلكونة أراقب أسراب التلاميذ في زيهم وأنا اتذكر أيام ماضية كانت تقطر براءة وبسمات صافيه لم تستطع الايام بعد أن تنسيني أياها ، ياتري كل تلميذ منهم بيحلم بأية وياتري أحلامه هتتحقق!ـ
أنا عن نفسي حلمت أكون مدرسة والحمد لله بقيت مدرسة بتعب في شغلي وبتبسطت لما بحس أني وصلت معلومة لبني أدم صغير، وبتبسطت لما يقولولي ميس دعاء أو لما أحس أني أثرت في شخصية حد منهم وبقي يقلدني في سلوكياتي ..ربنا يسعد كل التلاميذ ويجعلها سنة سعيدة عليهم ويقويهم ويصبرهم علي جمود المناهج ويحققوا كل اللي يتمنوه ويحفظ بسمتهم

27 Comments:

At الأحد, سبتمبر 17, 2006 9:04:00 م, Blogger sahar said...

كل سنة وانتي طيبة ياحسن ميس في الدنيا وعقبال ماتفرحي بولادك وهما رايحين المدرسة ويكونوا شاطرين ودمهم خفيف ذي مامتهم
*******************
ويارب طنط ترجع لنا بالسلامة يارب

 
At الاثنين, سبتمبر 18, 2006 2:39:00 ص, Blogger metkazy said...

انتى عارفه يا ميس دعاء انا هفرح امتى

لما اسأل طفل صغير نفسك تطلع ايه ويقولى حاجه غير ظابط ودكتور ومهندس

نفسى يقولى متخصص فى علوم البحار
حاجه كده غير تقليديه

يارب تكون سنه سعيده عليهم وعليكى

وادعيلنا الباطنه تعدى على خير

 
At الاثنين, سبتمبر 18, 2006 5:28:00 ص, Blogger rony said...

السلام عليكم
تصدقى يا مس دعاء _انا طفله برضه علشان تفرحى بيا _اول مره اشوف مدرسه فرحانه انها مدرسه فى ظل ظروف التعليم القاحله الموحشه بتاعه اليومين دول..قال يعنى كانت حلوه على ايامى..عموما انا خلاص بعيد عنك اتخرجت وهاشتغل مدرسه لاختى الصغيره ولو عندك يعنى اى ارشادات او نصائح بما انك مدرسه قديمه يعنى هايكون كويس علشان الحقيقه الاطفال دلوقتى مش زينا خالص عايزين العلم فى شيكولاته او عصير مش فاضيين يتعملوا وراهم حاجات اهم...زى الكارتون اللى ملوش معنى طبعا او اللعب وحاليااختى الصغيره ابتدت تتريق على المدرسين وهى بالمناسبه فى تالته ابتدائى وانا يعنى عليا ابتديت اتريق على المدرسين فى اعدادى...أخص الله يكسفنى ..المهم هاستنى نصايحك وارشاداتك ...وكل سنه انتى طيبه بمناسبه المدراس ورمضان والعيد الصغير والكبير علشان محدض ضامن عمره وسلملى على ام احمد واحمد
سلام

 
At الاثنين, سبتمبر 18, 2006 6:06:00 ص, Blogger مفلس افندى الرايق said...

ميس دعاء جود افتر نون

مى هابى تو سى يو

ميس دعاء جود افتر نون

وي لف اسكول وز يو

ميس دعاء

انت فاهمه انا بقول ايه

ولا ترابتاتى تربتاتو

ههههههههه

كل سنه وانتى طيبه وبجد اجمل حاجه تعلمى والاجمل تلاقى لتعليمك نتيجه
ربنا يوفقك

هو انتى ميس فى اييه؟
اصلى عاوز ابقى شاطر ف الطبيخ

 
At الاثنين, سبتمبر 18, 2006 9:19:00 ص, Blogger msafa said...

كل سنهوانتى طيبه يا مس دعاء ... انا بنتى اسمها فاطمة
(بطه)

 
At الاثنين, سبتمبر 18, 2006 12:27:00 م, Blogger دعاء غريب said...

سحر:
وانت طيبة وبصحة وسعادة
ويارب ماما تيجي بالسلامة وحشتني قوي ومحتاجها اكتر
أحمد عامل اية في المدرسة
:)

ـــــــــــــــ
metkazy :
تصدقني يا متكاظي لما سألت تلاميذي عايزين يطلعوا اية فوجئت من الاجابات
هي أختلفت عن ايامنا احنا كان اقصي طموحنا ظابط او دكتور او طيار وكده
دلوقتي عايز يبقي لعيب كورة مصمم جرافك .ممثل . مغني ..وعندي واد تخين شويتين عايز يبقي شيف
:)
ان شاء الله الباطنة هتعدي علي خير وتجيب تقدير كمان وتقول ميس دعاء قالت بس ساعتها ابقي اعملنا تخفيض علي الفيزيتا

ــــــــــــــــ
rony :
انا فعلا بحب التدريس جدا للاسباب اللي قولتها في البوست بجانب اني بموت في الاطفال وبرجع طفله صغيرة معاهم نلعب ونتنطت وبرغم من اني مدرسة ثانوي وبدرس لاعدادي وابتدائي حاليا لكني لسه ما قبلتش طفل بالمعني اللي كان موجود زمان
يعني تخيلي السنة اللي فاتت ولد عندي في 5 ابتدائي كتب لي جواب غرامي !!
وبالنسبة للارشادات والنصايح مش هقولك غير كوني زيهم وانزلي لعقلهم خشي عالمهم اتكلمي بالطريقة اللي بيفهموا حاولي تكسري جود المناهج
وفي وقت فراغهم كوني برضه معاهم مفيش مانع تتفرجي معاهم علي الكرتون او تنظموا رحلة وتخرجي معاهم
وخليهم يحبوكي ويخافوا يزعلوكي
بس كده الموضوع سهل محتاج شوية طوله بال بس

وكل سنة وانت طيبة
وسعيدة بزيارتك جدا
ويارب تتكر ديما
وسلامك وصل لام احمد

 
At الاثنين, سبتمبر 18, 2006 12:28:00 م, Blogger دعاء غريب said...

مفلس افندى الرايق :
الله يخليك يافندم علي تعليقاتك اللي زي العسل دي
هتاخد ثواب كبير قوي علي البسمة الحلوة اللي بتدهالي مع كل تعليق
انا مدرسة لغة عربية يافندم
هتقولي بتحبي العربي
هقولك مش قوي
بحبه علشان لغة القرآن وعلشان بحب الشعر وبتذوقه اما باقي الفروع الجامده مش بطيقها !
بالنسبة للدروس في الطبيخ
فتقدر تعتبرني استاذة قسم في كل انواع الاطباق الشرقية والغربية كمان

ـــــــــــــــــ

msafa:
وانت طيب يافندم ويخليك بطة وام بطة

 
At الاثنين, سبتمبر 18, 2006 12:29:00 م, Blogger أُكتب بالرصاص said...

رمضان كريم
وكل عام وانت والمدارس بخير

 
At الاثنين, سبتمبر 18, 2006 1:06:00 م, Blogger محمد أبو الفتوح said...

العيال بيلعبوا على قلبى
العيال بيزرعوا الأمل ف وحل أمطار الشتا
و يشقطوا الضحك لبعضهم من بين شفايف نونو
و انا العيل كبير السن
نفسى أفصل مريله و بدال ما اروح ع الجامعه
ألف و اروح على(مدرسة الحريه الإبتدائيه )
و أحلى سلاااااااااام

 
At الاثنين, سبتمبر 18, 2006 4:05:00 م, Blogger safa said...

السلام عليكم, ما جذبنى للبلوج هى صورة البروفيل, بصراحة كل ما دخل بلوج ألقى الصورة, قلت لنفسى و بعدين بأه, أى حكاية الصورة اللى فى معظم التعليقات. كل سنة و أنت طيبة بمناسبة شهر رمضان, و بقى شرفينا فى مدونتنا يا مدرستنا الرقيقة

 
At الاثنين, سبتمبر 18, 2006 4:10:00 م, Blogger rony said...

السلام عليكم...تانى
والله يامس دعاء دودو اختى دى انا اللى مربياها لدرجه امبارح بتقول لماما مينفعش بابا يتجوز رنا _اللى هى انا _ علشان اقدر اقولها ماما
بتخاف منى وبتحترمنى وكل حاجه بس المشكله انى بحس ان تفكيرها بيتلغبط لما تروح المدرسه بتنسى كل حاجه او بتتناسى وطبعا لا يخفى عليكى ان الاطفال مع بعض بيفسدوا بعض بس هانعمل ايه نستحملهم بقى وامرنا لله
عموما انا سعيده جدا بردك وبجد انا معجبه بمدونتك اوى
سلام

 
At الاثنين, سبتمبر 18, 2006 4:23:00 م, Blogger دعاء غريب said...

أكتب بالرصاص:
وانت طيب وبخير وبصحة وسعادة
رمضان كريم
واشكرك علي اهتمامك وتعليقاتك الكتير
والله رفعت معنوياتي يا فندم

ــــــــــــــــــــــــ
محمد أبو الفتوح :
صدقني أنا كمان نفسي ارجع بمريله وضفاير
مش علشان اذاكر بعد الشر
لكن علشان ترجعلي نظرتي المتفائلة والحياة ترجع بمبي
ـــــــــــــــــــــــــ
safa :
وعليكم السلام
والله سعيدة ان صورتي كانت السبب اللي جذبك لمدونتي وتخليني اتعرف علي انسانة رقيقة زيك..انا زرت مدونتك علي فكرة وعجبتني ربنا يوفقك
ــــــــــــــــــ

rony :

انت عسوله يارنا واختك دودو كمان عسولة ربنا يخليكم ويسعدكم
انا نفسي نبقي صحاب اكتر
خصوصا ان لينا صديق مشترك
محمد هشام عبيه
فيعني لو تحبي نتواصل اكتر ممكن نتبادل الايميلات

 
At الاثنين, سبتمبر 18, 2006 4:28:00 م, Blogger rony said...

اكيد طبعا
هو محمد هشام فاضحنى فى كل حته كده
عموما طبعا لو تحبى فى اى وقت تاخديه منه او منى اكون سعيده جدا بجد
هاستنى ردك

 
At الاثنين, سبتمبر 18, 2006 4:32:00 م, Blogger دعاء غريب said...

أزال أحد مشرفي المدونة هذا التعليق.

 
At الاثنين, سبتمبر 18, 2006 5:37:00 م, Blogger مفلس افندى الرايق said...

تعالى فى موضوع مهم

 
At الاثنين, سبتمبر 18, 2006 11:07:00 م, Blogger saso said...

دعاء
انا سعيدة انك بتحبي شغلك كدة صاحبتي مدرسة علم نفس بتحسسني ان اول يوم دراسة دة عملية تعذيب

ممكن اسالك علي حاجة ؟ لية حرصكم مكتوبة بالصاد لية مش بالسين
مدارسكم
حارسكم
:)

 
At الاثنين, سبتمبر 18, 2006 11:19:00 م, Blogger ...دنيتي said...

كل سنة وانتي بألف خير ورمضان كريم:)

 
At الاثنين, سبتمبر 18, 2006 11:41:00 م, Blogger rony said...

خلاص يا دودو وصل وضفتك وطبعا هاتعرفينى لوحدك و بتحبى البطاطس
وعادى يعنى محمد صديق عزيز هو اللى عرفنى بالليله دى كلها ولو اتقبض عليا هايبقى هو السبب .انا ببقى اون لاين كتير اوى ياريت اشوفك

 
At الاثنين, سبتمبر 18, 2006 11:42:00 م, Blogger rony said...

خلاص يا دودو وصل وضفتك وطبعا هاتعرفينى لوحدك و بتحبى البطاطس
وعادى يعنى محمد صديق عزيز هو اللى عرفنى بالليله دى كلها ولو اتقبض عليا هايبقى هو السبب .انا ببقى اون لاين كتير اوى ياريت اشوفك

 
At الثلاثاء, سبتمبر 19, 2006 7:41:00 ص, Blogger LAMIA MAHMOUD said...

انا عايزة اروح المدرسة .. مليش دعوة

 
At الثلاثاء, سبتمبر 19, 2006 10:24:00 ص, Blogger Yousra said...

أنا بردوا بدرس بس مش المهنة الأساسية ، لكن بشعر بمنتهي السعادة و أنا أتعامل مع الكائنات الصغيرة ديه:) بحس معاهم أن الدنيا مفيهاش حقد و لا حسد و لا مصلحة

 
At الثلاثاء, سبتمبر 19, 2006 2:15:00 م, Blogger Sampateek said...

اهلا و سهلا
ده احنا طلعنا زمل
بس انا كان نفسي اكون مهندسة ديكور
و بقيت مدرسة
الحمد لله علي كل حال
ربنا يوفقك و تبقي دايما ناجحة و مؤثرة في من حولك
خالص حبي و امنياتي العذبة
كل سنة و انت طيبة
رمضان كريم

 
At الثلاثاء, سبتمبر 19, 2006 3:04:00 م, Blogger دعاء غريب said...

مفلس أفندي الرايق:
زرتك يافندم والموضوع طلع جامد موت

ــــــــــــــــــــــــ
saso :
اشكرك ياقمر علي الزيارة
وعلي الملاحظة الخطيرة دي
ربنا يحرسك يابنتي
:)

ــــــــــــــــــــــ
...دنيتي :
وانت بالف صحة وسعادة
انت وكل أحبابك

ـــــــــــــــــــــ
rony:
ميرسي يابطاطس علي قبول الدعوة
وربنا يجعله عامر
معندكيش حلة محشي ورق عنب
نفسي فيه وماما مسافرة بفكر أقايس واعمله بس مستنيه لما اجيب رقم الاسعاف
علي فكرة انا اون لاين من الصبح وما شفتكيش!
ــــــــــــــــــ

 
At الثلاثاء, سبتمبر 19, 2006 3:10:00 م, Blogger دعاء غريب said...

LAMIA MAHMOUD :
حضري المريلة وهاخدك معايا بكرة
بس اعملي حسابي في السندويتشات
:)

ــــــــــــــــــــــــ

Yousra :
واللهي يابنتي أنا بحسد العيال اللي بندرس لهم دول
علشان مدرسيهم زي وزيك

ــــــــــــــــــــــــ
كلبوزة لكن سمباتيك:

كلبوزة هانم عندنا يادي الهنا يادي الهنا
شرفتيني ياجميلة بزيارتك
طلعتي زمل ومدرسة برضه
اوعي تكوني بتاكلي سندوتشات الاولاد ياكلبوزة
يلا كل سنة وانت طيبة واولادك وزوجك طيبين
رمضان كريم

 
At الثلاثاء, سبتمبر 19, 2006 3:46:00 م, Blogger مفلس افندى الرايق said...

انضم للدفاع عن رسولك

 
At الثلاثاء, سبتمبر 19, 2006 5:45:00 م, Blogger مأمون المغازي said...

دعاء غريب

وتدوين رائع

أجمل ما فيه البساطة والبراءة والطفولة الجميلة

قرأت أربع تدوينات كلها أعجبتني

سأعود لأقرأ أكثر

تحياتي

 
At الثلاثاء, سبتمبر 19, 2006 8:04:00 م, Blogger دعاء غريب said...

مفلس أفندي الرايق:
طبعا هنضم للدفاع عن رسولي
عايزة أقولك انت مدون رائع

ــــــــــــــــــــــــــــــــــ
مأمون المغازي

نورتني بزيارتك وبتعليقك وبرأيك الجميل في شخصي المتواضع
وانا زرتك علي فكرة وعجبتي مدونتك واسلوبك جدا
ربنا يوفقك يافندم

 

إرسال تعليق

Links to this post:

إنشاء رابط

<< Home

الحسابة بتحسب! Free Web Counter
كيف تنشىء مدونة تدوين .. عالم المدونات كلام مش بفلوس!